Deputetët e Kuvendit të Kosovës kanë kohë deri më 28 prill që ta zgjedhin presidentin e ri të shtetit, në rast të kundërt zgjedhjet e reja të parakohshme duhet të mbahen brenda 45 ditësh. Por a është gati KQZ për zgjedhje të reja? Numërimi i votave të kandidatëve për deputetë, votimi jashtë Kosovës dhe angazhimi e trajnimi i stafit që merret me mbarëvajtjen e zgjedhjeve janë vetëm disa nga telashet e identifikuara nga Komisioni Qendror i Zgjedhjeve, që shoqëruan zgjedhjet e përgjithshme të mbajtura më 9 shkurt dhe 28 dhjetor 2025, si dhe dy runde të zgjedhjeve lokale më 12 tetor dhe 9 nëntor 2025. Për këto problematika të hasura, KQZ-ja ka rekomanduar që të ndryshohen Ligji për Zgjedhjet e Përgjithshme dhe Rregullat Zgjedhore, por një gjë të tillë do të çonte në pamundësinë e mbajtjes se zgjedhjeve të parakohshme këtë vit, ndërmjet 31 majit dhe 7 qershorit. Sipas analistëve, këto ndryshime ligjore kërkojnë kohë dhe testime.