Ministria e Shëndetësisë e Kosovës njoftoi të enjten se ka marrë 100.620 doza të vaksinës Pfizer/BioNTech. Këtë kontigjent të vaksinave, Kosova e ka siguruar përmes programit COVAX të Organizatës Botërore të Shëndetësisë, që ka për qëllim shpërndarjen e vaksinave në vendet e varfra. “100.620 vaksinat e siguruara përmes COVAX janë një hap i rëndësishëm për të ndjekur planin e vaksinimit me ritme të shpejta dhe pandërprerë, sipas të gjithë parametrave të sigurisë dhe cilësisë”, thuhet në njoftim. Dy javë më parë, Kosova siguroi 38.400 doza të vaksinës nga COVAX-i si dhe 15.000 doza të tjera, donacion nga Bashkimi Evropian. Në Kosovë, procesi i vaksinimit kundër COVID-19 ka nisur në fund të marsit, pas marrjes të 24.000 dozave të vaksinës AstraZeneca. Fillimisht janë vaksinuar punonjësit e shëndetësisë, personat mbi 80 vjeç dhe ata me sëmundje kronike. Aktualisht po vazhdon faza e dytë e procesit të imunizimit, ku janë duke u vaksinuar grupmosha 65-79 vjeç. Autoritetet në Kosovë kanë thënë se synojnë që deri në fund të vitit të vaksinojnë 60 % të popullatës. Kosova është vendi i vetëm në rajon që ende nuk ka nënshkruar kontratë me ndonjë kompani prodhuese, për sigurimin e vaksinave. Vaksinimi po bëhet me dozat e dhuruara nga OBSH-ja dhe Bashkimi Evropian.