Kontrollet intensive policore në rrugët urbane dhe interurbane kanë vijuar të jenë intensive, me qëllim parandalimin e aksidenteve rrugore si dhe rritjen e parametrave të sigurisë së jetës në rrugë. Gjatë 24 orëve të fundit, polica rrugore ka çuar në pranga 23 drejtues mjetesh, nga të cilët 13 për drejtim mjeti në gjendje të dehur dhe 10 për drejtim mjeti pa leje drejtimi. Policia gjithashtu ka parandaluar disa ngjarje të mundshme rrugore të cilat përbëjnë rrezik për jetën. Po në 24 orët e fundit, punonjësit e policisë rrugore kanë arrestuar në flagrancë 5 drejtues mjetesh, për tentativë për të korruptuar punonjësit e Policisë Rrugore, me një vlerë nga 1.000 deri në 2000 lekë të rinj. Po ashtu janë ndëshkuar me masë administrative 2 mijë e 32 drejtues mjetesh, për shkelje që janë rrezik potencial për përfshirje në aksidente rrugore. Gjithashtu janë pezulluar 39 leje drejtimi, nga të cilat 28 për drejtim mjeti me shpejtësi tej normave të lejuara, si dhe 11 leje drejtimi, për drejtim mjeti nën ndikimin e alkoolit.