Me rastin e 24 majit, Ditës së Presidentit, ish-presidentët e Kosovës kanë zhvilluar disa aktivitet dhe kanë bërë thirrje për unitet të spektrit politik. Presidentja aktuale e Kosovës, Vjosa Osmani, së bashku me ish-presidentët Fatmir Sejdiu, Behgjet Pacolli dhe Atifete Jahjaga, kanë bërë homazhe te shtatorja e ish-presidentit, Ibrahim Rugova. Me këtë rast, presidentja Osmani tha se ish-presidenti Rugova ishte arkitekt i shtetit të Kosovës, dhe siç theksoi ajo, "ai ndikoi në bashkimin e mbarë popullit". "Zgjedhjet e para presidenciale të 24 majit të vitit 1992, shënuan themelimin e institucioneve të para të Kosovës dhe ishin mesazh i qartë i qëllimeve të popullit për liri dhe pavarësi" Edhe ish-presidentët e Kosovës kanë vlerësuar lartë figurën e Rugovës, duke thënë se "Rugova ishte ikonë e pamposhtur e të gjitha kohërave". Ish-presidentët thanë se Rugova e ka udhëhequr Kosovën në periudhën më të rëndë të Kosovë, në kohën kur rrezikohej edhe shfarosja. Kosova ka pasur gjashtë presidentë, Ibrahim Rugovën, Fatmir Sejdiun, Atifete Jahjagën, Behgjet Pacollin, Hashim Thaçin dhe tani edhe Vjosa Osmanin. Në Kosovë, 24 maji shënohet si Dita e Presidentit.