Franca i ka bërë thirrje Shteteve të Bashkuara që të heqin ndalesën për eksportin e vaksinave kundër COVID-19 dhe materialeve për prodhimin e vaksinave. Kjo thirrje e Parisit është mbështetur edhe nga shtetet e tjera në Evropë. “I bëj thirrje Shteteve të Bashkuara që t’i japin fund ndalesave për eksport, jo vetëm për vaksinat, por edhe për përbërit e vaksinave, të cilat ndalojnë prodhimin e tyre”, tha presidenti francez, Emmanuel Macron gjatë samitit të Bashkimit Evropian që u mbajt në Porto të Portugalisë më 8 maj. Këto komente të Macronit erdhën teksa shtetet evropiane janë befasuar nga vendimi i SHBA-së për të hequr patentën e pronësisë intelektuale për vaksinat, me qëllim që të luftohet pandemia COVID-19. SHBA-ja deri më tani ka vaksinuar me të paktën një dozë të vaksinës 56 për qind të popullatës të saj të rritur, por nuk eksporton doza të vaksinës dhe de fakto ka ndalesë për materialet me të cilat prodhohen vaksinat. Ndërkaq, një numër i shteteve në SHBA po kthejnë mbrapsht dozat e vaksinave që u janë dhuruar nga qeveria federale, teksa numri i vaksinimit në bazë ditore ka rënë në mbarë vendin, për shkak të uljes së kërkesës. Teksa infektimet dhe kërkesa për vaksinim po bien, administrata e presidentit amerikan Joe Biden është nën presion në SHBA dhe jashtë vendit për eksportin e vaksinave, përfshirë këtu 60 milionë doza të vaksinës AstraZenecas, të cilat po qëndrojnë në depo dhe nuk po përdoren, për shkak se kjo vaksinë nuk është miratuar për përdorim në SHBA. BE-ja, pavarësisht se në fillim kishte një fushatë të ngadaltë të vaksinimit, këtë javë ka arritur shifrën prej 150 milionë dozave të administruara dhe blloku evropian beson që brenda dy muajve do të vaksinojnë mjaftueshëm njerëz që të arrihet imuniteti i komunitetit. Kancelarja gjermane, Angela Merkel ka thënë se BE-ja shumicën e prodhimit e ka eksportuar dhe të njëjtën gjë duhet ta bëjë edhe SHBA-ja.