Presidenti amerikan Donald Trump u ka kërkuar votuesve t'i shohin zgjedhjet e mesit të mandatit sikur ai vetë të ishte në fletën e votimit; dhe të shtunën, një nga paraardhësit e tij demokratë bëri pikërisht këtë. Dhjetë ditë para zgjedhjeve që do të përcaktojnë se kush do të ketë kontrollin e Kongresit, Barack Obama doli në fushatë për të akuzuar presidentin republikan për korrupsion, për të vënë në lojë strategjinë e tij ndaj Iranit dhe për të kritikuar ashpër estetikën e stilit "të artë" që ai ka përdorur në rinovimet e Shtëpisë së Bardhë. Obama bëri fushatë për kandidatët demokratë në tubime në Cleveland dhe Detroit, duke e vënë në lojë administratën Trump. Gjatë fushatës në Michigan Obama e përshkroi votimin e 3 nëntorit si një mjet që do të shërbente për të "vënë nën kontroll të paktën disa nga marrëzitë" e presidencës së Trumpit. Obama, që shërbeu si president nga viti 2009 deri në vitin 2017 kur Trump nisi mandatin e tij të parë, mbetet një nga figurat më popullore mes demokratëve. Ata shpresojnë se përfshirja e tij në garë mund t'i mobilizojë mbështetësit e tyre për një garë të ngushtë për Senatin amerikan. "Nuk kemi parë kurrë një president që të shkëlqejë në mashtrime siç bën ky," tha Obama. "Nuk kemi parë kurrë një president kaq të vendosur për të shitur favore në këtë mënyrë. Tani duket se partia e tij përfaqëson një qeverisje të korruptuar, ose të paaftë, ose mungesë të plotë qeverisjeje", tha Obama. Ai gjithashtu vuri në lojë gjithashtu pretendimet e administratës për fitore ndaj Iranit. Ai argumentoi se lufta i ka dhënë Iranit më shumë ndikim ekonomik, pasi kërcënimet e tij për të sulmuar anijet në ngushticën e Hormuzit i kanë shqetësuar eksportuesit e naftës. "Irani tani ka të drejtë vetoje mbi ngushticën e Hormuzit, përmes së cilës kalon nafta për në tregun botëror," tha Obama.