Pas mbylljes së 5 zyrave paralele serbe në veriun e Kosovës, kanë reaguar edhe autoritetet serbe. Kryeministri i Serbisë, Millosh Vuçeviq, ka kërkuar "reagim urgjent" dhe "të ashpër" nga bashkësia ndërkombëtare, teksa sipas tij Serbia ka dërguar një mesazh të qartë se është në krah të paqes e stabilitetit në rajonin e Ballkanit. . Pavarësisht kësaj kryeministri serb është shprehur se “nuk do të lejojë dhunë dhe masakër kundër popullit të saj”, thuhet në një njoftim të Qeverisë së Serbisë. Ndërkohë në vazhdën e reagimeve është edhe ai I Drejtorit të Zyrës për Kosovën në Qeverinë e Serbisë, Petar Petkoviç, I cili shprehet se mbyllja e këtyre institucioneve në veri të Kosovës do të ketë pasoja të gjera në normalizimin e marrëdhënieve ndërmjet Prishtinës dhe Beogradit. Lidhur me aksionin e policisë së Kosovës, ka reaguar edhe zëvendësdrejtori i Policisë për rajonin e veriut, Veton Elshani, I cili për REL është shprehur se njësitet speciale kryen një aksion në katër komunat me shumicë serbe në veri. Aksioni u krye në dy lokacione në Mitrovicën e Veriut, si dhe në një lokacion në Zubin Potok dhe në një tjetër në Leposaviq. Policia zhvilloi një aksion edhe në spital, në pjesën e lavanderisë, pas raporteve se mund të ketë armatim, sipas tij.