Këshilli i Ministrave ka miratuar një vendim sipas të cilit, ndërtimi i banesave nga bashkitë e vendit me qëllim strehimin e të pastrehëve do të jepet me konçesion. Referuar këtij vendimi tokat shtetërore do i kalojnë privatit, si zona për zhvillim urban me qëllim zbatimin e ligjit social për strehimin. Njësitë e vetëqeverisjes vendore duhet të analizojnë paraprakisht dhe të bëjnë planifikimin e zonave që do të zhvillohen për strehim në territorin e tyre. Procedura konkurruese, sipas Vendimit të Këshillit të Ministrav, synon që trualli në pronësinë e bashkive të shkëmbehet me sipërfaqe ndërtimore sipas vlerës më të lartë të shkëmbimit, kur ndërtimi realizohet me financim të subjekteve private.