Vetëm tre javë para takimit të 22 qershorit me kryeministrin e Kosovës Albin Kurti, Presidenti Serb Aleksandër Vuçiç është treguar i vendosur per mosnjohje të pavarësisë së Kosovës. Mediat serbe raportojnë se gjatë një mbledhje me partinë e tij ai është shprehur pro kompromisit dhe kundër njohjes . “Ne duam një kompromis, por unë nuk do të nënshkruaj njohjen e një Kosove të pavarur” Vuçiç ka deklaruar se Serbia duhet të marrë pjesë në negociatat e ndërmjetësuara nga Brukseli. Ky do të jetë takimi i parë mes Aleksander Vuçiç me Albin Kurtin Kryeministër ndërsa ai më herët ka paralajmëruar se do të ngrejë padi kundër Serbisë për gjenocid në Gjykatën Ndërkombëtare të Drejtësisë. Shefi i qeverisë së Kosovës shprehu bindjen e tij se Serbia ka kryer krime lufte dhe gjenocid ndaj qytetarëve të Kosovës. Kurti ka ftuar për takime edhe me krekrët e partive opozitare Enver Hoxhaj të PDK, Lumir Abdixhiku të LDK, dhe Ramush Haradinaj të AAK. Takimet planifikohet të mbahen gjatë fillimit të javës së ardhshme, sipas orareve të përshtatshme për të gjitha palët, dhe do të jenë në shërbim të mirinformimit dhe bashkërendimit të spektrit politik për çështje me interes të Republikës së Kosovës. Albin Kurti ka deklaruar vazhdimisht se për çështjet me interes nacional do të konsultohet dhe do të kërkojë bashkëpunim të mirëfilltë me partitë dhe liderët opozitarë.