Brenda një ndërtese në Mitrovicën e Veriut, policia e Kosovës gjeti dhe sekuestroi disa armë zjarri dhe municione, por deri më tani nuk është bërë i mundur identifikimi apo arrestimi i ndonjë personi. “Për momentin nuk ka persona të arrestuar, ndërsa hetimet lidhur me rastin janë duke vazhduar”, tha Policia e Kosovës përmes një njoftimi zyrtar. Sipas njoftimit, gjatë këtij operacioni policor në bodrumin e ndërtesës afër sheshit Car Lazar u gjetën dy pushkë, 50 fishekë, pranga, maska, këllëfë arme dhe karikator të zbrazët. Autoritetet e Kosovës ndëroi gjetën edhe armë të llojeve të ndryshme ko në pjesë të ndryshme të Kosovës, kryesisht në pjesën veriore të banuar me shumicë serbe. Më 18 shtator, policia njoftoi se kishte gjetur armë në Zveçan. Më pas, ministri në detyrë i Punëve të Brendshme, Xhelal Sveça, deklaroi se armët u gjetën në pronën e njërit prej të akuzuarve për sulmin e 2023 në Banjskë të Zveçanit. Një polic i Kosovës u vra pasi një grup serbësh të armatosur sulmoi policinë më 24 shtator 2023. Kosova fajëson Serbinë për këtë sulm, ndërkohë që autoritetet e drejtësisë kanë ngritur akuzë për 45 persona, por vetëm ndaj tre prej tyre po zhvillohet gjykimi, ndërkaq të akuzuarit e tjerë gjenden në arrati. Prokuroria pritet të nisë hetimet për të kuptuar se kujt i përkisnin armët e zjarrit.