Ambasada e Shteteve të Bashkuara të Amerikës në Prishtinë, ka reaguar ashpër ndaj vendimit të fundit të qeverisë Kurti, për mbylljen e zyrave paralele serbe në vedi të Kosovës. Në një deklaratë urgjente për mediet, ambasada bën me dije se qeveria e Kosovës nuk është koordinuar me asnjë nga parnterët ndërkombëtarë për mbylljen e këtyre zyrave. “Shtetet e Bashkuara dhe partnerët tanë ndërkombëtarë kanë kërkuar vazhdimisht nga Qeveria e Kosovës që të ketë prioritet koordinimin me bashkësinë ndërkombëtare dhe të mos ndërmarrë veprime të njëanshme për çështjet në agjendën e Dialogut të lehtësuar nga BE-ja. Dështimi i Qeverisë së Kosovës për t'iu përgjigjur këtyre kërkesave reflekton një përkeqësim real dhe në rritje të partneritetit tonë. Siç e kemi theksuar më parë, veprimet e pakoordinuara të Qeverisë së Kosovës i vënë në rrezik më të madh qytetarët e Kosovës dhe ushtarët e KFOR-it, përshkallëzojnë në mënyrë të panevojshme tensionet rajonale dhe minojnë reputacionin e Kosovës si një partner i besueshëm ndërkombëtar.”, thuhet në deklaratën e ambasadës. Përfaqësia amerikane shkon edhe më tej, kur parlajmëron përkeqësim të marrëdhënieve me Ministrinë e Brendshme që është në krye edhe të Policisë, pas këtyre veprimeve, edhe pse ka qenë vetë SHBA që ka mbështetur themelimin e Policisë së Kosovës dhe modernizimit të saj. “Veprimet e Qeverisë do të ndikojnë edhe në cilësinë dhe natyrën e bashkëpunimit tonë me Ministrinë e Punëve të Brendshme dhe elementët vartës të saj.”, thuhet në reagimin e ambasadës.