Pesë persona janë arrestuar këtë të dielë gjatë një operacioni të përbashkët mes Policisë së Kosovës dhe Prokurorisë Speciale, në kuadër të hetimeve për krime lufte për rastin e njohur si ‘Reçaku II’. Sipas njoftimit zyrtar, gjatë këtij operacioni janë ekzekutuar urdhër-kontrolle në disa zona të ndryshme, nga ku rezultoi me arrestimin e pesë e personave mëngjesin e kësaj të dieleje. Rasti ‘Reçaku II’ lidhet me hetimet për krime lufte që rrjedhin nga ngjarjet në fshatin Reçak të Shtimes gjatë luftës në Kosovë. Më herët, Prokuroria Speciale kishte ngritur aktakuzë në mungesë ndaj 21 personave të dyshuar për krime lufte kundër popullsisë civile, lidhur me masakrën e Reçakut të 15 janarit 1999, ku u vranë 42 civilë shqiptarë. Kjo masakër shtyu NATO-n të niste bombardimet për t’i dhënë fund luftës së viteve 1998-’99 në Kosovë.