Situata e pandemisë në Kosovë vijon të jetë e përkeqësuar. Vetëm këtë të hënë janë shënuar edhe 20 viktima të tjera nga koronavirusi, përkatësisht 11 burra e 9 gra. Sipas njoftimit të Ministrisë së Shëndetësisë, në 24 orët paraprake janë regjistruar 932 raste të reja të të infektuarve me koronavirus. Këto raste dalin pas testimit të 7.384 mostrave në laboratorët shtetërorë dhe private dhe numri më i lartë i të infektuarve, i përket grupmoshës 30-39 vjeç. Gjatë 24 orëve të fundit janë shëruar edhe 962 qytetarë, ndërsa raste aktive aktualisht janë 26,525. Sipas raportit ditor, 60 pacientë janë në kujdes intensive dhe 1.062 janë duke u trajtuar me oksigjeno-terapi. Të shtunën, më 28 gusht, ministri i Shëndetësisë, Arben Vitia tha se kanë rritur kapacitetet spitalore deri në 1.600 shtretër pas rritjes së rasteve të reja me koronavirus.