Me autorizim të Prokurorisë Themelore në Prizren, Policia e Kosovës ka nisur veprimet hetimore për dyshimet për manipulim të votës dhe falsifikim të dokumenteve zgjedhore në procesin zgjedhor për deputetë, lidhur me zgjedhjet e parakohshme parlamentare të 28 dhjetorit. Sipas Betimit për Drejtësi, në kuadër të hetimeve, mbi 100 zyrtarë të angazhuar nga Komisioni Qendror i Zgjedhjeve gjatë zgjedhjeve janë ftuar të merren në pyetje, ndërsa pritet të ketë edhe persona të ndaluar. Kryeprokurori i Prizrenit, Petrit Kryeziu ditë më parë kishte autorizuar me shkrim Policinë e Kosovës që, të identifikojë personat përgjegjës dhe të sigurojë prova, përfshirë procesverbalet dhe nënshkrimet. Teksa rinumërimi I votave po I afrohet fundit, Prokuroria Themelore në Prizren ka evidentuar dallime mes fletëvotimeve dhe votave të numëruara për kandidatët brenda subjekteve politike, duke ngritur dyshime serioze për keqpërdorim të votave. Prokuroria ka theksuar se manipulimi i votës dhe falsifikimi i dokumenteve zgjedhore përbëjnë vepra penale dhe se këto raste do të trajtohen pa asnjë kompromis.