Maqedonia e Veriut mban sot zgjedhjet për kryetare dhe këshilltarë në 80 komuna të vendit dhe në kryeqytetin Shkup. Mbi 1 milionë e 800 mijë votues pritet ta ushtrojnë të drejtën e tyre kushtetuesenë 3.480 qendra votimi në vend për 309 kandidatë për kryetar komune dhe 576 lista kandidatësh për anëtarë të këshillave komunale. 112 mijë vetë janë të regjistruar në listën e veçantë zgjedhore si persona që jetojnë jashtë shtetit. Në zgjedhje marrin pjesë 22 parti, 19 koalicione dhe 119 kandidatë të pavarur. NUmrin më të madh të kandidatëve për kryetar komune, 16, e ka Shkupi. Votimi ka nisur në orën 07:00 të mëngjesit për rajonalet që mbahen rreth një vit e gjysmë pas zgjedhjeve parlamentare dhe presidenciale. Një ditë më parë votuan një kategori e caktuar personash: të sëmurët, ata që janë në arrest shtëpie, të burgosurit dhe personat në azilet e të moshuarve. Që të shpallen fitues, kandidatët duhet të sigurojnë mbi 50% të votave në raundin e parë, në të kundërt shkojnë në balotazh në nëntor. Sondazhet paraprake për zgjedhjet e teta të pushtetit vendor që nga pavarësia e vendit, tregojnë se në komunat me shumicë maqedonase gjendja është më e parashikueshme, por nuk është po kaq e thjeshtë të shihet fituesi në komunat shqiptare. VMRO-DPMNE kryeson në anketime me 26.7%, e ndjekur nga Lidhja Socialdemokrate e Maqedonisë me 11.1%, ndërsa forcë e tretë është BDI dhe Aleanca Kombëtare për Integrim me 9.9%. Në fund vjen Koalicioni VLEN me 7.5%., i cili është aktualisht partner në qeveri me VMRO-DPMNE-në. Analistët mendojnë për cdo rast se pavarësisht faktit që partia në pushtet, VMRO-DPMNE, është favorite në këto zgjedhje, rezultati mes partive shqiptare mund ta trondisë koalicionin qeverisës dhe të shkaktojë zgjedhje të parakohshme parlamentare.