Pas dhjetë ditësh, Komisioni Qendror i Zgjedhjeve ka përmbyllur procesin e numërimit të të gjitha votave nga zgjedhjet e parakohshme parlamentare të shtatë qershorit. Sipas rezultatit të përgjithshëm, Lëvizja Vetëvendosje del si fuqia e parë me 47% të votave apo 53 ulëse në parlament. Pas saj renditet Partia Demokratike e Kosovës me 19% që i garantojnë 22 mandate. Lidhja Demokratike e Kosovës mori 16% të votave të qytetarëve të Kosovës dhe siguroi 18 ulëse në kuvend, ndërkohë që Aleanca me 6.7% merr 7 mandate. 10 ulëse janë të garantuara për komunitetin serb, 9 prej të cilave i ka fituar Lista Serbe dhe një Nenad Rashiqi. 10 mandate të tjera janë të garantuara për minoritetet jo-serbe. Pas përfundimit të numërimit, Komisioni Qendror i Zgjedhjeve ka marrë vendim për rinumërim të fletëvotimeve që janë numëruar në Qendrat Komunale të Numërimit me qëllim që të sigurohet se nuk ka pasur manipulim të votave të kandidatëve për deputetë siç ndodhi pas zgjedhjeve të 28 dhjetorit.