Një protestë marshim me seri bombash molotov drejt institucioneve kryesore. Ky ka qenë skenari i protestës së opozitës, që nisi në sheshin përpara kryeministrisë dhe për rreth tre orë u zhvendos në disa pika kyçe të kryeqytetit. Për herë të parë, në protestë u shmang podiumi dhe fjalimet politike e ju dha përparësi akteve të mosbindjes civile. Godina e qeverisë ishte e rrethuar nga forca të shumta të rendit, kur protestuesit hodhën molotov, flakadanë e fishekzjarre, duke i vunë flakën edhe pemëve në bulevard. Policia përdori lëndë lotsjellëse për të sprapsur turmën. Prej andej deputetët e opozitës udhëhoqën marshimin drejt selisë së partisë socialiste. Gjatë rrugës, protestuesit i vunë flakën një stacioni autobusi dhe disa kazanëve të mbeturinave. I njëjti skenar u zbatua edhe në selinë e Partisë Socialiste, ku një seri bombash molotov u lëshuan drejt godinës dhe ju vu flaka banderolës në fasadën hyrëse. Sërish policia u kundërpërgjigj me gaz lotsjellës. Ndalesa e radhës ishte pak metra më larg, pranë ndërtesës së ministrisë së e më pas në Bashkinë e Tiranës, ku shpërthimet e molotovit lënduan edhe disa punonjës të policisë. Marshimi vijoi për disa orë në rrugët e kryqytetit, ku mosbindja civile u përkthye në thyerje te xhamave të reklamave, dhe zjarrvënie në kazanët e mbeturinave. Në fund, të paktë në numër protestuesit u ndalën në sheshin përpara parlamentit. Skenari edhe atje ishte i njëjtë dhe kundërpërgjigjia gjithashtu. Të paktën 10 punonjës policie u dëmtuan nga sulmet e protestuesve, ndërsa Autoritetet siguruan se kanë marrë të gjitha masat për identifikimin, kapjen dhe shoqërimin e personave të përfshirë në sulme mbi Policinë dhe institucionet shtetërore. Pas tre orësh, drejtuesit e Partisë Demokratike u rikthyen në seli, prej ku paralajëmruan vijimin e aksionit. Pas dënimit të deputetit Ervin Salianji, opozita njoftoi nisjen e një beteje pa kthim, duke këmbëngulur në një qeveri teknike që të organizojë zgjedhjet e ardhshme parlamentare.