Masakrën ne kompleksin e kompanise FedEx në Indianapolis e kreu një 19 vjecar, Brandon Hole, I cili kishte punuar atje vitin e kaluar. Policia publikoi së fundi emrat e 8 viktimave, shumica e të cilëve rezulton të ishin pjesëtarë të komunitetit Sikh. Mes tyre, Amarjeet Kaur Johal, një 66 vjecare që punonte kryesisht me turne nate për të ndihmuar financiarisht familjen e saj që përfshinte dhe tre nipër e mbesa. Mbesa e saj, Komal Chohan, tha se disa pjesëtarë të tjerë të familjes që punojnë tek FedEx janë të traumatizuar. Gjyshja ime, të afërmit e mi, familjet tona nuk duhen të ndihen të pasigurtë në vendin e tyre të punës, në vendin e tyre të lutjeve apo kudo tjetër, u shpreh ajo. Mendohet se agresori shënjestroi qëllimisht komunitetin Sikh. Në Indiana besohet të jetojnë 8000 deri në 10 mijë sikh. Pjesëtarë të një besimi që u shfaq në Indi në shekullin e 15-të, ata nisën të vendoseshin në këtë pjesë të Amerikës mbi 50 vjet më parë dhe në 1999-tën hapën vendin e tyre të parë të lutjes atje, të njohur si gurdwara. Masakra erdhi vetëm një muaj pasi 6 shtetas me origjinë aziatike u qëlluan për vdekje në Atlanta, ndërsa numri I sulmeve kundër aziato-amerikanëve është shtuar ndjeshëm që prej fillimit të pandemisë.