Situata shfaqet mjaft e nderë në Malin e Zi, e këtë e dëshmoi qartë dhe lajmi se presidenti Millo Gjukanovic, dhe bashkëshortja e tij, Llidija, kanë marrë kërcënime me vdekje përmes rrjetit social, Tëitter. Policia malazeze ka nisur një hetim mbi ngjarjen, dhe Prokuroria Themelore e Shtetit po ashtu urdhëroi të verifikohet menjëherë se kush e ka bërë në këtë platformë kërcënimin që e lidhte fatin e Gjukanovicit me atë të diktatorit italian, Benito Mussolini. Mesazhi është dërguar nga një profil me emrin Boris Jankovic e u shoqërua me fotografi të ekzekutimit të Mussolinit. Gjukanovici është kandidat i Partisë Demokratike të Socialistëve (DPS) në zgjedhjet presidenciale në Mal të Zi, të cilat mbahen më 19 mars. Dy ditë më parë, nga I njëjti profil janë dërguar kërcënime me vdekje edhe ndaj deputetes Draginja Vuksanovic Stankovic, e cila po ashtu garon në zgjedhjet presidenciale. Vuksanovic Stankovic i raportoi kërcënimet në polici, konfirmuan autoritetet e rendit. “Kërcënimet cilësohen si vepër penale e rrezikimit të sigurisë dhe prokuroria përgjegjëse është e njoftuar për çdo gjë”, pohuan zyrtarë të policisë. Për shkak se vitin e kaluar Stankoviv mori vazhdimisht kërcënime, e për këtë arsye, nga mesi i vitit 2022, është nën mbrojtje 24-orëshe të policisë. Kryeministri Dritan Abazovic, i dënoi ashpër kërcënimet ndaj dy politikanëve të lartë, duke thënë se ato duhet të merren seriozisht, edhe pse shtoi se nuk ka arsye për panik. Pamjet: AFP