Ish-ministri i Tregtisë e Industrisë në Kosovë, Endrit Shala, është dënuar me dy vjet burgim për konflikt interesi nga shkalla e parë gjyqësore. Prokuroria Speciale e ka quajtur aktgjykimin rezultat të rëndësishëm, ndërsa mbrojtja ka vlerësuar se favorizimi i baxhanakut ligjërisht nuk përbën konflikt interesi. Prokuroria Speciale e akuzon Shalën për keqpërdorim të detyrës zyrtare meqë ai ka miratuar një vendim që sipas aktakuzës, i ka bërë favor baxhanakut, duke i mundësuar atij përfitim të kundërligjshëm. Prokuroria Speciale pretendon se më 30 maj 2019, Shala ka nxjerrë vendimin me të cilin e ka emëruar biznesin e baxhanakut të tij si përgjegjës për vlerësimin e konformitetit të karburanteve të naftës në Kosovë. Si rrjedhojë e këtij vendimi, sipas organit të akuzës, biznesi i baxhanakut është pasuruar kundërligjshëm në vlerë prej 732 mijë eurosh.Në të njëjtën aktakuzë me Shalën duke u gjykuar është edhe ish-ministri Vesel Krasniqi që është nënkryetar i Komunës së Malishevës, por për të është veçuar procedura në emër të zhvillimit efikas të procedurës penale. Në kohën sa ishin në qeveri, si Shala ashtu edhe Krasniqi ishin pjesë e partisë “Nisma”.