Asnjë nga personat e ardhur nga Afganistani në Kosovë nuk ka rezultuar pozitiv me Covid 19, pohuan për REL burime të Ministrisë së Punëve të Brendshme në Prishtinë. Mësohet se nga 111 afganët që kanë kërkuar strehim atje, 55 janë gra dhe fëmijë. Grupi i parë i qytetarëve afganë që i largohen vendit të tyre nga frika e një sundimi represiv taleban, mbërriti në Kosovë të djelën. Ata u transportuan nga Gjermania me një avion të forcave ajrore amerikane. Autoritetet kosovare po ashtu njoftuan se gjatë të hënës pritet të arrijë grupi tjetër i afganëve. Qytetarët afganë, që kanë punuar me NATO-n, së bashku me familjet e tyre, do të qëndrojnë përkohësisht në Kosovë, derisa t'iu sistemohet dokumentacioni për qëndrim afatgjatë në Shtetet e Bashkuara. Afganët që kanë arritur në Kosovë janë strehuar në ish-kampin e kompanisë Bechtel Enka, që gjendet pranë bazës ushtarake amerikane "Bondsteel" në Ferizaj.