Ditën kur liderët e BE-së kishin zbarkuar të gjithë në Tiranë për samitin e gjashtë politik, Bashkimi Evropian kritikoi ashpër Albin Kurtin dhe qeverinë e tij për veprimet e fundit të autoriteteve të Kosovës në veri, me mbylljen e objekteve të cilat shfrytëzoheshin për shërbime nga sistemi i Serbisë. “Operacionet dhe mbylljet e fundit të policisë në Kosovë rrezikojnë të përkeqësojnë tensionet dhe të ndikojnë negativisht në jetën e përditshme të komuniteteve lokale, si dhe të minojnë imazhin ndërkombëtar të Kosovës. Veprimet e njëanshme dhe të pakoordinuara minojnë përpjekjet për ndërtimin e besimit midis komuniteteve. Ne i bëjmë thirrje kryeministrit në largim Kurti dhe autoriteteve në Kosovë t’i ndalin këto mbyllje, të tregojnë përmbajtje dhe të shmangin masat përshkallëzuese” BE në reagim ka thënë gjithashtu se Kosova dhe Serbia duhet të angazhohen në mënyrë konstruktive për implementim e marrëveshjes për normalizim “pa vonesa dhe pa parakushte”. Në komunikatë është përmendur edhe Asociacioni i komunave me shumicë serbe.