Dy punonjësit e Inspektoriatit të Mbrojtjes së Territorit në Bashkinë e Tiranës, të denoncuar nga Fiks Fare në datën 9 prill 2025 se i kërkuan 4 milionë lekë një qytetari, janë marrë nën hetim nga Policia e Shtetit. Njëkohësisht, IMT-ja i ka pezulluar menjëherë nga detyra. “Duke vlerësuar me seriozitet situatën dhe në përputhje me Kodin e Punës, ju bëjmë me dije se 2 inspektorët e përfshirë në rastin e denoncuar në ‘Fiks Fare’ është marrë masa për pezullim nga detyra deri në verifikim të rastit në fjalë nga organet kompetente” thotë IMT-ja. Sipas saj, nuk tolerohet asnjë formë abuzimi me detyrën dhe shkelje e etikës dhe integritetit profesional. Ndërkohë në njoftimin për shtyp, Policia e Shtetit thotë se filloi procedimi penal në gjendje të lirë ndaj dy inspektorëve R.Xh, 35 vjeç dhe M.L, 34 vjeç. “Në pamjet e ‘Fiks Fare’, këta persona shfaqen duke i kërkuar një shumë parash një 48 vjeçari. Pas konsultimit me prokurorin u vendos procedimi në gjendje të lirë të shtetasve për veprën penale ‘shpërdorim detyre’” thuhet në reagimin e policisë.