Emisioni Fiks Fare solli një skandal me një qendër ku strehohen gratë e dhunuara të cilat kanë një urdhër mbrojtje dhe shteti i dërgon aty. Qendra e njohur nuk ka ushqim për fëmijët edhe pse aty strehohen nëna me foshnje. Kushtet e vështira në qendër kanë detyruar shumë gra të dhunuara të largohen nga aty. Madje dhe vetë punonjëset me shumë lehtësi u tregojnë derën, kujdo që ankohet apo kërkon diçka. Dy gra të dhunuara të strehuara në këtë qendër tregojnë kalvarin e vuajtjeve aty, ku thonë se fëmijët e tyre nuk flejnë gjithë natën nga të pangrënët. Ato tregojnë për Fiks Fare se foshnjet kanë 4 ditë që nuk janë ushqyr dhe punonjëset u kanë thënë " Qumësht s'ka, jepini ujë me sheqer". Të dhunuarat tregojnë se para disa muajsh kur janë strehuar në këtë qender kanë gjetur edhe gra të tjera të cilat nga kushtet e vështira janë larguar. Duke shpresuar të mos jenë kthyer tek dhunuesit!