Por, disa ditë pas transmetimit, zyra bën një njoftim në rrjetin social “Instagram”, ku shkruan se: “Zyra transferohet te Kodra e Diellit në Tiranë. Takimet do të jenë vetëm më rezervim dhe në prani do të jetë dhe administrator i kompanisë”. Ka një numër telefoni, 0696624… “Këtu mund të kontaktoni për të lënë takim! Secili aplikand do të kontaktohet vetë për procedurat e mëtejshme të vizës!” thuhej në njoftim. Gazetarët telefonuan sërish këtë numër dhe sërish kishte bllokuar thirrjet hyrëse. Ndërkohë, pas këtyre veprimeve të kësaj zyre e cila po tenton të shmangë Fiksin, por edhe qytetarët, në redaksinë tonë kanë mbërritur të tjera denoncime. Disa persona deklaruan të njëjtën skemë. Në redaksinë e Fiksit dërguan kontratat dhe faturat e pagesës, gjithmonë në dorë dhe jo në bankë. Akt-marrëveshja me firmën, mandate pagesat dhe një dokument “ligj i zbatueshëm”. Asnjëra prej tyre nuk ishte në formë ligjore, pasi janë bërë jashtë zyrave noteriale. Qytetarët deklarojnë se kanë paguar nga 200 paund, 2400 iu kanë thënë se do ti paguanin kur të shkonin në Londër, Liverpul dhe Mançester. Pohojnë se kanë paguar deri në 800 paund, për të gjithë pjesëtarët dhe askush s’ka marrë përgjigje. Pavarësisht këtyre denoncimeve dhe mbylljes së zyrës, faqja e B&M Group në rrjetin social “Instagram”, iu është përgjigjur disa qytetarëve. Ata deklarojnë se zyra është mbyllur përkohësisht dhe do të rihapet pas disa ditësh.