Fiksi merr informacion edhe në ZVA Maliq, ku drejtoresha Gentjana Braho fillimisht falenderoi gazetarët në ngritjen e problemit dhe premtoi se do u kthente një përgjigje zyrtare si dhe një zgjidhje për nxënësit. Në përgjigjen e saj Zyra Vendore Arsimore Maliq shpjegoi se në bazë të udhëzimit të ministrisë më datën 28 korrik 2021, kur ka më shumë se 10 nxënës mësimi zhvillohet i ndarë vetëm në lëndët: Gjuhë Shqipe, Gjuhë e huaj dhe Matematikë. Duke qenë se në shkollën 'Teki Kolaneci' numri i nxënësve është më i vogël se 10 në bazë të vendimit nuk cohen mësues shtesë. Për këtë arsye nxënësve u ofrohet mundësia e ndjekjes së proçesit arsimor në shkollën 9- vjeçare "Agimi" në Maliq. ZVA Maliq në zbatim të VKM nr 682 për përdorimin e fondeve publike për transportin e mësuesve dhe nxënësve që mësojnë jashtë vendbanimit, siguron pagesën për transportin. Por deri më sot vetëm një prind e ka transferuar fëmijën në shkollën e Maliqit me shpenzimet personale, kurse fëmijët e tjerë vazhdojnë të mësojnë në klasën kolektive në Kolanec.