Prokuroria e Shkodrës, nëpërmjet ekspertimeve dhe këmbënguljes së drejtuesit të saj, Albert Murçaj, ka shpallur të pafajshëm një oficer policie, i cili kishte aksidentuar për vdekje një 49-vjeçar. Fiks Fare faktoi me dokumente se vendi i ngjarjes së viktimës Agim Shkambi është ndryshuar. Nga këqyrja e fillimit rezultoi se viktima ishte jashtë rruge, ndërkohë më pas vendi i ngjarjes u bë "në rrugë". Në redaksinë e emisionit investigativ u ankuan bashkëshortja dhe vajza e viktimës, të cilat treguan për gazetarët aksidentin që ndodhi në datën 29 janar 2021 në fshatin Shtoj i Ri ne Shkodër. Ato tregojnë dinamikën e aksidentit, ku Agimi ishte me biçikletë, jashtë karrexhatës së rrugës. Sipas tyre, autori i aksidentit është Gjergj Gjeloshi, inspektor policie në Shkodër. Autori është ndaluar fillimisht nga policia dhe më pas ka dalë para gjykatës, por Gjykata e Apelit e ka liruar me një garanci pasurore. Nënë e bijë tregojnë se dosja është manipuluar nga Prokuroria e Shkodrës, e cila fillimisht e ka marrë të pandehur, madje e ka futur në burg, por më pas çuditërisht ka pushuar çështjen.