Në datën 21 tetor 2021, emisioni Fiks Fare denoncoi veprimet e prokurorisë së Shkodrës, e cila kishte lënë në sirtar dosjen e vdekjes se një punëtori në Malin e Zi. Prej dy vitesh ky organ akuze nuk kishte bërë asnjë veprim, duke detyruar nënën e dy fëmijëve të mitur të endet në dyert e institucioneve të drejtësisë. Në tetor 2021, Marte Shkambi kërkonte prej dy vitesh fajtorin e vdekjes së bashkëshortit, Lulash Shkambi. Ajo thotë se babai i dy fëmijëve 10 dhe 7 vjeç humbi jetën në datën 5 shtator 2019 në afërsi të Ulqinit, në Mal të Zi. Punonte duke prerë dru, i pasiguruar. Në datën 25 shtator 2019 kishte shkuar me një motosharrë në një parcelë. "Punonte te një firmë në Shtoj, Ulqin. E sollën në Shqipëri po atë ditë, ndërsa një autoambulancë e priste në Han të Hotit" thotë e veja. Ajo ngre dyshime për veprimet e Spitalit Rajonal Shkodër, si e morën në doganë, ndërsa burri i vdiq në tetor 2019. Dhe, prej asaj kohe dosja ishte në prokurori pa asnjë veprim, pa marrë kartelën dhe pa dërguar asnjë letër porosi në Mal të Zi, duke lënë të venë në rrugë me dy fëmijë të mitur. Pas kësaj ankese, Fiks Fare kërkoi informacion në Prokurorinë e Shkodrës. Sipas një dokumenti, procedimi penal për vdekjen e Lulash Shkambit është regjistruar në datën 28 korrik 2020 për veprën penale shkelje e rregullave të mbrojtjes në punë. Sipas saj, në datë 15 nëntor 2021, disa ditë pas transmetimit të investigimit në Fiks Fare, është urdhëruar kryerja e disa veprimeve të tjera hetimore shtesë, si verifikime pranë Spitalit Rajonal Shkodër, verifikime pranë Pikës së Kalimit Kufitar Muriqan dhe asaj të Malit të Zi, identifikimin e personit që ka njoftuar urgjencën etj. Po ashtu në të njëjtën datë është përpiluar kërkesa për ndihmë juridike drejtuar autoriteteve të drejtësisë malazeze, e cila është përcjellë tek autoritetet përkatëse në datë 16 nëntor 2021. Prokuroria thotë se nga Spitali Rajonal Shkodër është marrë kopja e kartelës klinike të viktimës dhe në vijim i është kërkuar sërish informacion shtesë këtij institucioni lidhur me disa të dhëna të cilat nuk rezultojnë qartë nga kartela. "Hetimet lidhur e procedimin penal në fjalë vazhdojnë, janë në fazën e mbledhjes së informacionit dhe përcaktimit të përgjegjësisë së secilit subjekt që ka marrë kontakt apo ka dijeni për ngjarjen në fjalë. Hetimet janë shtrirë në disa drejtime, të cilat për momentin përbëjnë sekret hetimor" përfundon Prokuroria e Shkodrës.