Grupi i xhirimit i emisionit "Fiks Fare" shkoi në Parkun Natyror Kune Vain në Lezhë, për të parë të gjithë zonën, pas informacioneve se "po hidhen inerte dhe po punohet me mjete të tonazhit të rëndë pa asnjë leje". Madje, asnjë nga institucionet nuk kishte ndërhyrë. Kamera e Fiks Fare konstatoi një grumbull të madh me inerte, ku fillimisht ishin tulla, llaç dhe mbetje betoni pranë njërit prej kanaleve, atij natyralit, që mbush lagunën me ujë. Sipas informacioneve që disponin Fiks Fare, individë apo firma të ndryshme private po tentojnë që të devijojnë kanalet që furnizojnë me ujë lagunën, duke "përfituar" tokë. Fiks Fare disponon disa harta të vjetra se kanali që po tentohet të mbyllet është kanali natyral që furnizon me ujë lagunën. Madje, në hartat e para viteve '90 duke qartë se kanali që po mbushet ka qenë i vetmi dhe ai natyrali. Kohët e fundit janë hapur dy kanale të reja, por njëri prej tyre nuk ka funksionuar. Aktualisht, funksionon vetëm një i tillë, i hapur në afërsi të atij natyralit, por që është shumë e vështirë të funksionojë, pasi ka përplasje rrymash midis ujërave të Lagunës dhe Detit Adriatik. Ndërkohë, kamera e Fiksit filmoi automjete të tonazhit të rëndë që hidhnin dhera dhe mbetje të tjera brenda parkut. Madje, gjatë gjithë ditës. Automjetet qarkullonin lirisht buzë detit dhe shkojnë në brendësi të lagunës. Ato hedhin dhera pranë disa pishave, teksa e gjithë zona ku shkarkojnë kamionët po mbushet.