Tre individë me probleme të shëndetit mendor në Orçikël të Kukësit jetojnë si mos më keq. Dy vëllezër dhe një motër të moshës mbi 30 vjeç kanë lindur me probleme të shëndetit mendor dhe kujdestra për ta është vëllai i tyre bashkë me familjen e tij. Ai apelon në Fiks Fare se nuk ka mundësi t'u shërbej pasi si vëllezërit edhe motra janë bërë shumë agresiv. Motra ishte e shtruar në Spitalin Psiqiatrik në Tiranë në gjendje të përkeqësuar, por edhe me të dikush kishte abuzuar dhe sot ajo ka një fëmijë. Vëllai i tyre Luani kërkon ndihmë që shteti t'i sistemoi në një institucion të specializuar, pasi ai e ka të pamundur t'u shërbej. "Kam bërë gati shishen e benzinës që për festat e nëntorit të digjemi të gjithë bashkë se nuk mundem më" pohon ai. Ndërkohë që tregon për Fiksin se vëllezërit që prej muajit qershor nuk e lejojnë më që t'i laj dhe çdo të mirë e të ligë e bëjnë në dhomën që flenë. Fiksi u interesua edhe në zyrën e Shërbimit Social Shtetëror në Kukës për këtë familje . Por në bazë të ligjit për personat me aftësi të kufizuara të cilët sistemohen në qendra të specializuara ka një kriter moshe e cila është nga 0 deri në 25 vjeç. Meqë dy vëllezërit dhe motra e kanë kaluar moshën ligji ia ngarkon përgjegjësinë e kujdesit të tyre familjarit.