Massimiliano Locorotondo ankohet në Fiks Fare se 17 vjet më parë u hetua dhe gjykua për akuzën e trafikut të mjeteve motorike. Në shkallë të parë u shpall i pafajshëm, po ashtu edhe në apel, ndërkohë Gjykata e Lartë e riktheu për rigjykim. Pasi është liruar ai është rikthyer në Itali dhe nuk është njohur me vendimet e më passhme. Në rigjykim Gjykata e Tiranës e shpalli fajtor dhe e dënoi me 8 vite burg. Shtetasi italian shprehet se nuk është njoftuar fare për gjyqin dhe duke mos apeluar brenda afateve ai ka marrë formën e prerë. Në këto kushte Shqipëria e ka shpallur në kërkim ndërkombëtar dhe ka çuar kërkesën edhe në Itali për ekstradim. Gjykatat italiane vendosën për ekstradimin e tij por me kusht që të rigjykohej në shkallë të parë. Massimiliano erdhi në Shqipëri ku qëndroi për një muaj në burg e më pas Gjykata e Tiranës vendosi që ai të gjykohej në gjendje të lirë, kurse apeli pezulloi dënimin prej 8 vite burg, si dhe u shua masa e arrestit deri në vendim të formës së prerë nga Apeli Tiranë.Por edhe pas këtij vendimi ende ekziston në sistem emri i tij dhe në çdo pikë kufitare ai ndalohet , shoqërohet dhe kontrollohet. Kjo pasi emri i tij ende figuron në Interpol Tirana, pra figuron në "Orange Notice". Për shkak të këtyre veprimeve ai nuk lëviz dot i lirë edhe pse ndaj tij nuk ka një vendim të formës së prerë. Nga Fiksi kërkon që Interpoli t'i fshijë emrin nga lista. Fiks Fare kërkoi informacion në Interpol Tirana dhe në Policinë e Shtetit se mbi çfarë vendimi e kanë vendosur këtë shtetas në listën e Interpolit. Ndërkohë pas kërkesës së Fiks Fare shtetasi italian i bëri me dije emisionit se avokati i tij ishte njoftuar se Interpol Tirana ia ka hequr emrin nga lista.