Fiks Fare denoncoi mbrëmjen e së premtes sorollatjet e ish pronarëve që të përfitojnë kompensimin apo kthimin e trojeve të tyre të sekuestruara. Megjithëse vitet kalojnë, këto familje enden në dyert e institucioneve, kryesisht te Agjencia e Trajtimit të Pronave, për të marrë "thërrimet" që shpërndan shteti. Në emisionin investigativ u ankua z.Leka Bungo, një emër i njohu i kinematografisë shqiptare dhe regjisor i njohur. Familja e tij ka pasur një truall prej 8000 metra katrorësh truall brenda qytetit të Elbasanit, ku një pjesë i është kthyer, një pjesë i është kompensuar truall dhe një pjesë i është kompensuar "tokë arë". Megjithëse kanë kaluar rreth 25 vite nga njohja e kësaj familje si pronar, ata ende nuk po e gëzojnë dot, pasi administrata e Agjencisë së Trajtimit të Pronave ndër vite e ka sorollatur. Dhe, pasi ka fituar dy vendime gjykatash që e detyrojnë ATP-në ta kompensojë për truall, sërish kjo Agjenci nuk e zbaton, me arsyetimin se është në Gjykatën e Lartë. Vendimi i Apelit citon se duhet të ekzekutohet menjëherë nga përmbarimi. Por, ATP pretendon se "vendim i formës së prerë është Gjykata e Lartë".