Fiks Fare denoncoi dhe faktoi mbrëmjen e së martës emërimet nepotike në Bashkinë e Kavajës. Kryetari i ri i Bashkisë së Kavajës, Fisnik Qosja, i zgjedhur në 14 maj 2023, ka bërë disa emërime të njerëzve të afërt. Ai ka punësuar disa kushërinj, bashkëshorten e dajës, burrin e kushërirës së parë, krushkën. Dhe, të gjithë në poste kyçe, si në marrëdhëniet me publikun, në urbanistikë, te kabineti apo te prokurimet. Përkatësisht Jurgen Kariqi, djali i tezes së Qosjes, është emëruar shef kabineti. Mimoza Beçerri, nusja e dajës, është emëruar përgjegjëse e marrëdhënieve me publikun. Agron Xhihani, burri i gocës së dajës, është emëruar përgjegjës i Urbanistikës. Romina Kala, kunata e motrës (krushka) është emëruar përgjegjëse te prokurimit publike. Edhe pse Fiksi kërkoi më përpara një përgjigje në lidhje me këto emërime në Bashkinë Kavajë, ajo mbërriti pas trasmetimit të emisionit. Në të Bashkia Kavajë sqaron se disa nga emërimet janë të përkohëshme pasi vendet ishin të lira, por nuk shpjegon kriteret me të cilat është bërë përzgjedhja e emërimeve. Ndërsa përsa i përket emërimit të Drejtorit të Kabinetit Jurgen Kariqit, bashkia sqaron se ky është një post politik, por që ka rastisur që ai të jetë djali i tezes së kryetarit aktual të Bashkisë Kavajë.