Një qytetare nga Lushnja është ankuar në emisionin Fiks-Fare se nuk po gjen të drejtën nga organet e drejtësisë. Ajo dyshon se ish bashkëshorti ka tentuar të përdhunojë 2 fëmijët e saj dhe ka bërë veprime të turpshme në sy të tyre, vajzën që e ka me një ish bashkëshort tjetër, dhe djalin që e ka me këtë për të cilin ngre dyshimet. Qytetarja e shqetësuar tregon se para 2 vitesh ka ngritur një kallëzim penal për ish- bashkëshortin, pasi sipas saj bënte vepra të turpshme në sy të vajzës, por deri më sot ajo tregon se nuk është bërë asgjë. "Përderisa nuk është bërë asgjë për vajzën , ai po e bën dhe me djalin se nuk ka frikë" shprehet e shqetësuar qytetarja. Ajo tregon se ka vajtur shpesh herë në prokurori ka bërë dhe shkresa, por asnjë përgjigje nuk ka marrë. "Prokurore Merita thotë e ka çështjen Natasha, kjo e fundit thotë s'kam asnjë çështje tënden" sqaron denoncuesja. E gjendur përpara kësaj situate e ëma e dy të miturve kërkon ndihmën e Fiksit, jo vetëm për fëmijët e saj siç shprehet ajo, por edhe për fëmijë të tjerë që mund të bien pre e ish-bashkëshortit të saj. "Kërkoj vetëm të dalin me një vendim, sido që të jetë ai" thotë denoncuesja.