Enxhel Paja është një djalë jetim nga Belshi, i cili për t'u kujdesur për katër motrat dhe vëllezërit e tjerë u detyrua të lërë shkollën e të punojë për të fituar të ardhura për familjen. Para pandemisë ai sapo kishte nisur punë në një subjekt, që tregton ushqime të shpejta që ndodhet tek 'Vasil Shanto' në Tiranë. Si shumë punonjës të tjerë, atij i takonte paga e luftës. 40 mijë lekë të reja, për të cilat ka që në muajin mars që sorollatet dhe nuk po i tërheq dot. Pas disa ankesave në rrjetet sociale, në faqen e Ministrisë së Financave, nga Drejtoria e Tatimeve ju vu në dispozicion një numër llogarie në një banke të nivelit të dytë. Dhe në një nga përgjigjet citojnë se paga është kaluar në llogari dhe rezulton e tërhequr. Kur pyet në bankë për numrin e llogarisë i thonë se nuk gjendet dhe nuk është në emër të tij. I gjendur në këto kushte ai u ankuar pranë Fiksit me shpresën për të marrë zgjidhje. Bashkë me Enxhel Pajën, gazetarët e Fiksit ju drejtuan Ministrisë së Financave e cila pasi komunikoi me Drejtorinë e Tatimeve, ktheu një përgjigje. Në këtë përgjigje thuhet se: "Me angazhimin maksimal që Drejtoria e Përgjithshme e Tatimeve ka menaxhuar të gjithë procesin e shpërndarjes si dhe ka trajtuar çdo rast lidhur me pagat e luftës, lidhur me rastin e referuar nga ana e Fiks Fare informojmë se për individin Enxhel Paja ka aplikuar tatimpaguesi si punonjës i larguar nga puna përfitues në masën 2 paketa, ku janë vetdeklaruar dhe të dhënat bankare." Një tjetër burim i besueshëm brenda drejtorisë së tatimeve i konfirmoi gazetarëve të Fiksit se paga e luftës i është kaluar punëmarrësit, pronarit të subjektit zotit Alket Lamaj.