Një nga shkaqet kryesore të shkatërrimit të këtij Monumenti të Kulturës janë edhe pikat e shumta që marrin inerte nga Lumi Mat. Jo më larg se 200 metra larg Urës me Harqe, është një pikë që merr inerte nga lumi. Denoncimet e shumta të Fiks Fare, Top Channel, apo edhe ankesave të banorëve, nuk janë marrë në konsideratë nga institucionet. Fiks Fare bisedoi me prefektin e Lezhës, z.Gjokë Jaku. Ai tha se është në dijeni të problematikës, madje ka ngritur edhe grupe pune për evidentimin e dëmtimeve. Z.Jaku ishte i drejtpërdrejt në akuza, teksa fajësoi Ministrinë e Kulturës e cila e ka lënë këtë monument në mëshirë të fatit. "Mbrohet nga shteti vetëm me letra. Për 30 vjet është lënë në mëshirë të fatit. Askush nuk ka ndërhyrë. Të paktën ta konservonin. Nëse vijon në këto kushte, ura do të shembet" paralajmëroi Jaku. Ai fajëson direkt pikat që marrin inerte nga Lumi Mat. "Vetëm 4 janë me leje. 18 subjekte veprojnë pa leje, pasi iu është revokuar leja e shfrytëzimit. Dhjetëra të tjera janë në të zeze. Punojnë ditë e natë dhe askush nuk mban përgjegjësi" thotë ai. Më tej pohon se ka bërë 18 denoncime në Prokurorinë e Lezhës, por asnjë hetim nuk është bërë. Në fund thotë se pikat e inerteve, përveç Urës së Zogut, rrezikojnë edhe dy ura të tjera, Urën e Trenit dhe Urën e Autostradës. "U kam dërguar kërkesa dhe shkresa, por askush nuk ka reaguar. Nga Prokuroria, Ministria e Brendshme apo edhe IKMT. Kam bërë denoncime edhe me fotografi. Të gjithë heshtin" përfundon prefekti.