Fiks Fare denoncoi mbrëmjen e së hënës një skandal në Korçë, ku një subjekt tregtonte në të njëjtin vend gaz dhe oksigjen mjekësor. Në datën 5 nëntor 2021, në fshatin Voskopojë në Korçë ka shpërthyer një bombul gazi, duke u plagosur disa persona. Pas aksidentit, në vendin e ngjarjes kanë shkuar ekspertë policie dhe nga Inspektoriati Shtetëror Teknik Industrial. Shkak i aksidentit ishte impianti i gazit, i cili ishte i pacertifikuar. Pas kësaj ngjarje, në redaksinë e emisionit Fiks Fare mbërritën informacione për një stacion gazi në Korçë, i cili ishte rrezik për banorët dhe për konsumatorët. Subjekti ishte Korça Gas, ku një nga aksionerët është edhe z.Enver Shahinasi, drejtor i IKMT-së në qytetin e Korçës. Në këtë firmë, e cila ndodhet në rrugën Korçë-Drenovë, përveç se tregtohet gaz për automjete dhe familjarë, tregtohet edhe oksigjen mjekësor. Ligji e ndalon në mënyrë kategorike shitjen e oksigjenit dhe të gazit në të njëjtin vend! Madje, duhen një sërë licencash dhe lejesh nga pushteti qendror dhe lokal. Sipas një dokumenti, subjekti Korça Gas e ka aktivitetin në rrugën Korçë-Drenovë. Ndërkohë, prej vitesh, në këtë adresë është edhe firma Messer Albagaz! Kjo, e deklaruar në vitin 2014 në Qendrën Kombëtare të Biznesit. Kjo firmë, Messer, ka lidhur kontratë me Spitalin Rajonal të Korçës për furnizimin me oksigjen spitalor. Pra, dy kompani që tregtojnë gaz dhe oksigjen në të njëjtin vend! Madje, të dyja firmat i kanë deklaruar adresat në dokumente dhe askush nuk ka ndërhyrë, qoftë për të parë letrat!