Fiksi mori në intervistë shefin e Qarkullimit Rrugor të Tiranës Gerhard Baka, gjatë një patrullimi. Ai shpjegoi se drejtuesit e monopatinave nuk respektojnë sinjalistikat. Dalin nga korsitë, shkelin semaforin e si pasojë janë burim aksidentesh. Kodi Rrugor nuk e parashikon ndëshkimin e shkeljeve që vijnë nga këto mjete elektrike, e për pasojë për policinë rrugore nuk ka bazë ligjore për të vendosur masa administrative apo penale dhe mjaftohet vetëm me këshillime. Fiks Fare u interesua edhe pranë Drejtorisë së Shërbimit të Transportit Rrugor për të pyetur nëse kanë bërë një klasifikim për këto mjete dhe sipas nenit 344 i Vendimit të Këshillit të Ministrave nr 353 këto mjete klasifikohen bashkë me mjetet me pedal. Si rrjedhojë edhe policia rrugore për marrjen e masave administrative duhet të bazohet tek rregullorja që është në lidhje me qarkullimin e mjeteve me pedal. Këto mjete aktualisht nuk kanë kufizim përdorimi moshe.