Fiks Fare denoncoi veprimet e institucioneve shtetërore, të cilat blejnë peshk të cilësisë së parë për shtëpitë e pushimit të krerëve të shtetit dhe peshk të cilësisë së tretë për Azilet. Redaksia e emisionit investigativ siguroi dhjetëra dokumente nga tenderët e këtyre institucioneve, dhe pas një shfletimi të thjeshtë, rezultati ishte befasues. Shtëpitë e Pushimit, atje ku qëndrojnë krerët e shtetit, blejnë peshk dhe fruta deti të cilësisë së parë. Madje, edhe pajisje për pastrim dhe filetim të peshkut. Ndërkohë, i vetmi institucion që blen peshk të cilësisë së tretë është Shtëpia e të Moshuarve në Tiranë (Azili i Pleqve). Para pak ditësh, Agjencia e Blerjeve të Përqendruara, ka hapur një tender me objekt "blerje artikuj ushqimorë" me fond 6.7 milionë lekë. Në lotin 2, kjo agjenci kërkon "Blerje peshq" për Shtëpinë e të Moshuarve Tiranë, me fond 274 mijë lekë. Dhe, vetëm për Azilin, kërkohet të blihet peshk i cilësisë së tretë. Ndërkohë, institucionet e tjera në këtë tender kanë kërkuar të blejnë peshk të cilësisë së dytë.