Në datën 18 tetor 2021, emisioni Fiks Fare transmetoi një investigim në burgun e Peqinit, ku të afërmit e të burgosurve detyroheshin që të bënin tampon për COVID 19, në një laborator privat në qytet. Madje, doktorët dhe punonjësit e burgut i detyronin familjarët që të shkonin në laboratorin "Fland Lab", shumë afër burgut. Gazetarët e Fiks Fare shkuan në këtë laborator, dhe pa e bërë tamponin, morën një përgjigje NEGATIVE, brenda 2 minutash. Pas transmetimit, Inspektoriati Shtetëror Shëndetësor ka marrë masë ndaj këtij laboratori, duke i vendosur një gjobë 500 mijë lekë dhe duke e mbyllur. "Emisioni Fiks Fare në Top Channel ka informuar për laboratorin "Fland Lab" n Peqin, i cili nuk ishte i licensuar nga Ministria e Shëndetësisë dhe Mbrojtjes Sociale për kryerjen e testimeve molekulare RT - PCR për SARS COV 2" thuhet në përgjigjen e ISHSH. Sipas përgjigjes, menjëherë pas transmetimit të emisionit, ISHSH, dega rajonale Elbasan ka kryer inspektim në subjektin "Fland Lab", me person fizik Enkelejda Pashja, me aktivitet laborator klinik biokimik. "Bazuar në gjetjet e konstatuara, ISHSH ka marrë masë administrative në vlerën 500 mijë lekë gjobë. Dhe, vendim i ndërmjetëm për marrjen e masës urgjente, mbyllje të aktivitetit" thuhet në këtë përgjigje.