Fiks Fare ka denoncuar mbrëmjen e së enjtes një skemë që përdorin institucionet financiare që mbledhin borxhet e këqija. Pasi i lënë për një kohë të gjatë në "sirtar", derisa nuk faktohet vepra penale për shkak të parashkrimit të veprës penale, specialistët vijojnë me lajmërime, takime, ndërmjetësime e madje vendime gjykate. Por, pavarësisht se nuk faktohet ka apo jo vepër penale, detyrimi financiar duket se "është i përjetshëm". Në redaksinë e emisionit "Fiks Fare" u ankua Dritan Hamdiu, i cili tha se në muajin dhjetor 2020 i ka shkuar një shkresë, duke e njoftuar për një detyrim të një numri celular që ishte hapur në emrin e tij. "Numri ishte hapur në vitin 2009 dhe ishte edhe fotokopje e pasaportës sime. Unë s'kam marrë kurrë numër me 20. Deri në dhjetor 2020, mua s'më kishte lajmëruar askush për këtë detyrim, që kishte shkuar rreth 850 mijë lekë të vjetra. Nuk e di kush e ka hapur këtë numër, po kanë marrë të dhënat e mia personale. Mua letra më erdhi nga një kompani, e cila mbledh borxhet e këqija. Shkova te kjo kompani e më thanë se është borxh i vjetër. I thashë se s'kam pasur ndonjë numër dhe s'më ka lajmëruar njeri, po ata më thanë drejtohu Prokurorisë së Durrësit për falsifikim dokumentesh" thotë qytetari.