Fiksi solli telefonatën e Oficerit të Policisë Gjyqësore, Erion Çekrezi, që hartoi procesverbalin e arrestimit të qytetarit, me vëllain e të arrestuarit. OPGj-ja Çekrezi pranon në telefon se i arrestuari ka shkuar vetë atë natë në komisariat, pasi është telefonuar nga policia duke hedhur poshtë faktin se policia e arrestoi në flagrancë. Gjithashtu tregon se nuk ka patur asnjëherë më parë kallëzime për të për dhunë në familje, duke hedhur poshtë kështu faktin tjetër se dhuna ishte e përsëritur. Madje sipas oficerit z.Ruda nuk duhet të kishte shkuar atë natë në komisariat edhe pse e telefonuan sepse sipas tij “Gratë të fusin brenda edhe pse më vonë del i pafajshëm". Ai në telefonatë thotë se ka shumë raste të tilla. Pra edhe pse asgjë nga ato që ishin shkruar në procesverbal nuk janë faktuar, qytetari shkoi në paraburgim me akuzën e dhunës në familje të përsëritur.