Mijëra fermerë nga qarku i Korçës, Elbasanit dhe Beratit janë në pritje për të marrë paratë e mundit dhe djersës nga “Mika Korça”, firma gjysëm shtetërore, drejtuesit e së cilës janë zhdukur pa lënë asnjë gjurmë. Gazetarët e Fiks Fare udhëtuan në fshatrat e Pogradecit, Maliqit dhe Korçës, me kërkesë të dhjetëra banorëve që ankohen për firmën e mbledhjes së duhanit, e cila nuk u ka dhënë paratë prej shumë vitesh. Kjo problematikë është trajtuar shumë herë në emisionin Fiks Fare, duke filluar nga vitit 2017, por që ende s’ka marrë asnjë zgjidhje. Denoncimi i parë është bërë në vitin 2017 në Belsh, ku 2000 fermerët u ankuan se s’kishin marrë paratë e shitjes së duhanit nga firma, ku aksioner me rreth 40 % të aksioneve është edhe Ministria e Ekonomisë. Ndërkohë, në dhjetor të vitit 2020, Fiksi iu rikthye kësaj problematike, në fshatin Pocestë në Maliq, që u ankuan për të njëjtën problematikë. Në këtë kronikë, ish-Prefekti i Korçës Dhori Spirollari premtoi zgjidhje të shpejtë. Fiksi transmetoi edhe ankesën e fermerëve të fshatit Kalivaç të Pogradecit në dhjetor të vitit 2021, ndërsa sërish institucionet premtuan se “do ketë zgjidhje për 3 muaj”.