Banorët e fshatit Shtyllas iu drejtuan emisionit Fiks Fare, pasi denoncojnë dy mbikalimet e papërfunduar në Bypass-in e Fierit. Rreth dy javë më parë, kryeministri Edi Rama inaguroi përfundimin e Bypass-it, por mesa duket ende nuk ka përfunduar. Mosndërtimi i dy mbikalimeve të Shtyllasit dhe të Pojanit, sjell shqetësim për banorët, pasi e kanë të pamundur të kalojnë autostradën nga fshati për të punuar tokat apo e anasjelltas. Banorët shprehen se për të shkuar nga shtëpia deri te toka, i duhet të bëjnë një rrugë prej 20 km. Për të marrë një informacion të saktë se kur do të ndërtohen këto mbikalime, Fiksi iu drejtua kompanisë Combined Grup Contractin & Alb Building duke i kërkuar informacion rreth afatit të përfundimit të rrugës si dhe pse këto mbikalime kanë mbetur të papërfunduar. Në përgjigje të saj, kompania shprehet se i ka përshpejtuar punimet, në aksin kryesor të autostradës duke i përfunduar ato në datën 15 Qershor 2020, dy muaj përpara afatit të përfundimit të Kontratës, e cila është datë 15 gusht 2020. Ky përshpejtim dhe modifikim i grafikut të punimeve u bë për të lehtësuar qarkullimin e automjeteve para fillimit të sezonit turistik. Në këto kushte punimet në mbikalimin e km 16 dhe disa punime të tjera janë duke u kryer gjatë kësaj periudhe në përputhshmëri të plotë me afatet e kontratës.