Fiks Fare denoncoi disa herë një zyrë të quajtur “B&M” Group, e cila iu merrte qytetarëve deri në 2600 paund për t’i dërguar në Angli. Nëpërmjet kamerave të fshehta, Fiksi faktoi se qindra shqiptarë kanë bërë pagesa pranë kësaj zyre, e cila i kishte ambientet në qendër të Tiranës. Megjithë këto pagesa, asnjë prej qytetarëve nuk iu sigurua kontrata, teksa firma mëmë “B&M” Group në Angli konfirmoi se s’ka asnjë bashkëpunim me kompaninë shqiptare. Fiksi iu drejtua me një kërkesë zyrtare Policisë së Tiranës, nëse kishte nisur ndonjë hetim, nëse ka shpallur apo jo në kërkim policor administratorin apo punonjës të tjerë të kësaj zyre. Në përgjigjen e saj policia shkruan se janë administruar pesë raste kallëzimi lidhur me zyrën “B&M”. Shtetasi Haqif Hetemi, i cili nga të dhënat e regjistrit tregtar të Qendrës Kombëtare të Biznesit, rezulton administrator i subjektit, është shpallur në kërkim policor. Materialet procedurale janë dërguar në Prokurorinë pranë Gjykatës së Shkallës së Parë Tiranë dhe po hetohet për identifikimin e personave të tjerë të përfshirë në veprimtarinë e kësaj zyre.