Në muajin maj 2022, Fiks Fare denoncoi veprimet e disa individëve dhe institucioneve që mbushën dhe lejuan që kanali kryesor që furnizon me ujë deti lagunën Kune Vain në Lezhë të mbyllej. Kamionë të tonazhit të rëndë shkonin në brendësi të lagunës dhe hidhnin inerte. Disa persona iu prezantuan gazetarëve të Fiksit si “pronarë të Lagunës”, madje ata kishin edhe certifikata pronësie të kanalit me ujë. Pas denoncimit të parë, në pranga ranë disa persona, kryesisht të Zonave të Mbrojtura dhe të Inspektoriatit të Pyjeve. Një vit më vonë, në prill të vitit 2023, në redaksinë e Fiks Fare mbërritën të tjera denoncime. Sërish, kanali që furnizon me ujë lagunën po mbyllej. Në gjuhën popullore, kanali quhet “Gryka e Matkeqes”. Kanal i cili pas denoncimit të parë ishte hapur. Por individë të tjerë që pretendonin pronësi po në atë vend, po bënin një “urë” për të bërë biznes në plazh. Pas këtyre denoncimeve, ka reaguar Inspektoriati i Kombëtar i Mbrojtjes së Territorit (IKMT). Mjete të rënda të këtij Inspektoriati kanë shkuar pranë vendit “Gryka e Matkeqes” dhe kanë hapur kanalin.