Për banorët e një lagjeje të fshatit Krapës që administrohet nga Njësia Administrative Portëz në bashkinë e Fierit, edhe pse fshati ka tre ura, ata përsëri nuk kanë mundësi t'i lëvizin mjetet motorike drejt banesave të tyre, pasi nuk kanë rrugë komunikuese. Për të hyrë në fshat duhet të kalosh mbi lumin Gjanica. Bashkia aktuale e Fierit për këtë fshat para pak kohesh ka investuar në relizimin e dy urave të reja bashkë me rrugën që të çon në fshat. Por ky projekt nuk i shkon për shtat banorëve që ankohen në emisionin Fiks Fare. Dy urat e reja nga ku kalohet edhe me mjete nuk janë funksionale për lagjen e tyre, pasi rrugët komunikuese janë të bllokuara. Administratori i Njësisë Portëz Z. Pandeli Bozo shprehet se Bashkia e Fierit ka filluar para pak kohësh ndërtimin e dy urave dhe rrugës që futet në fshat. Ky investim nuk ka përfunduar akoma pasi pritet pas disa ditësh të fillojë dhe shtrimi i rrugës me rërë bituminoze. Banorët e lagjes të cilët përdorin urën pasarele që shërben vetëm për këmbësorët, duan që t'u shkojë makina deri tek shtëpia, por projekti në zhvillim nuk e ka përfshirë një gjë të tillë.