Një familje në fshatin Dukas ankohet se komshia i ka helmuar pulat pasi i prishnin bukurinë e shtëpisë së saj dhe nuk duronte dot erën e keqe. Për këtë familja e dëmtuar bëri një denoncim në polici. Në deklaratën e lëshuar në polici e denoncuara pranoi se i kishte helmuar pulat dhe se do binte dakord me të dëmtuarën për dëmshpërblim. Ky dakordësim nuk u bë pasi të dyja palët nuk ranë dakord për shifrën. Por duke mos firmosur deklaratën në polici, pasi mori vesh shifrën e akuzuara mohoi që ta kishte bërë ajo helmimin e pulave. Në këto kushte familja e dëmtuar kërkoi nga OPGJ të ndiqte çështjen dhe të bënte analizat laboratorike për të vërtetuar se pulat ishin helmuar nga fqinja e saj. Por OPGJ nuk e ka marrë parasysh këtë gjë dhe në bazë të dosjës që është dorëzuar në Prokurori, për shkak se nuk kishte prova të mjaftueshme është pezulluar çështja. Helmimin e pulave nga ana e fqinjës e konfirmon edhe kryeplaku i fshatit i cili ka qenë prezent gjatë deklarimeve, ku ka dëgjuar personalisht që fqinja ka pranuar fajësinë. Familja e dëmtuar vazhdon të kërkojë të drejtën e saj duke hapur sërish çështjen në Prokurorinë e Fierit. Ende pulat e helmuara mbahen në frigoriferin e familjes së dëmtuar me shpresën se do u bëhen analizat.