Gazetarët e "Fiks Fare" shkuan në Portin e Durrësit, duke pyetur punonjësit e firmës "Hili Company Limited (ltd)" që menaxhon Terminalin e Kontenierëve. Punonjësit i thonë gazetarëve se tenderi nuk po bëhet nga kjo firmë, por nga Autoriteti Portual. "Ne vetëm menaxhojmë. Mjetet janë të APD-së" thonë punonjësit. Pas kësaj përgjigje, Fiks Fare kërkoi informacion nga ky Autoritet për zhvillimin e këtyre tenderëve. "Investimi në flotën e mjeteve që shërbejnë për ngarkim shkarkimin e ngarkesave është një ndër përgjegjësitë kyçe të institucionit në funksion të performancës së ofrimit të shërbimeve ndaj klientëve të portit Durrës. Flota e mjeteve të APD-së për shkak të kohës së punës është në gjendje të amortizuar. Me këtë qëllim dhe duke qenë që flota e mjeteve është e amortizuar, APD në politikat e saja të investimit do vijojë me rinovim të flotës së mjeteve në terësi sipas vlerësimit të gjendjes teknike të tyre" thuhet në përgjigjen e Autoritetit Portual. Megjithatë, në një komunikim të mëparshëm me ish-koncesionarin e këtij terminali, morëm përgjigje se mjetet ishin në gjendje shumë të mirë dhe se janë rinovuar vazhdimisht. Por, Porti i Durrësit këmbëngul se investimi për blerje vinçi MHC po kryhet për rinovimin e kësaj flote. Pra, investimi i tanishëm shkon drejtpërdrejt për interesa të kompanisë që e menaxhon, e cila ka fituar të drejtën e shfrytëzimit të taksës së ngarkim shkarkimit të kontenierëve për 5 vjet.