Policia e Shtetit ka reaguar pas denoncimit në Fiks Fare të një qytetari, i cili pohoi se ishte paguar nga grupet kriminale për të kryer gjymtime dhe djegie makine. Me zë dhe figurisë, Fiksi faktoi të gjithë rrjetin, nga porositësi, objektivi dhe personat që do merrnin pjesë. Menjëherë pas këtij denoncimi, Policia e Shtetit, shkruan se "në datën 7 shtator 2022, Policia e Lushnjes i ka marrë deklarime shtetasit që denoncoi rastin. Madje, janë kryer të gjitha veprimet procedurale për shoqërimin dhe intervistimin e palëve të përfshira në këtë çështje. Drejtori i Drejtorisë Vendore të Policisë Fier ka bërë pezullimin e menjëhershëm nga detyra të punonjësit të Policisë, shtetasit A. K., me detyrë shef i Krimeve i Komisariatit të Policisë Lushnje, deri në përfundim të hetimeve. Ndërkohë, Drejtori i Përgjithshëm i Policisë së Shtetit ka urdhëruar Drejtorinë e Standardeve Profesionale, për nisjen e hetimit disiplinor për punonjësin e Policisë, me detyrë shef i Krimeve i Komisariatit të Policisë Lushnje" thotë Policia e Shtetit.